A igualdade de oportunidades no Centro de Desenvolvemento Rural “O Viso” lévase traballando dende a constitución da entidade ata a actualidade de xeito transversal e implícito en calquera programa ou actuación. Ademais, dende o programa “ELAS: EMPODERAMENTO, LIBERDADE, AUTOESTIMA, SORORIDADE” dámoslle continuidade ós servizos e actividades específicos da entidade a prol da igualdade no rural limiao:

1. INFORMACIÓN, ORIENTACIÓN, ASESORAMENTO E APOIO: servizo permanente de acollida, apoio, orientación a mulleres en situación de vulnerabilidade na comarca da Limia. Nalgúns casos, o CDR faise cargo da xestión, do cargo económico e do acompañamento nos casos en que a muller non ten familia ou rede de apoio e ten que saír do domicilio, atopándose cunha soidade durísima, insoportable e inxusta para ela. Acompañamos ás mulleres á Garda Civil, acompañamos ás mulleres no momento do xuízo e acompañamos ás mulleres ata que non teñen praza na casa de Acollida.

2. OBRADOIROS DE APODERAMENTO DA MULLER RURAL: Lévanse a cabo actividades de autocoñecemento, comunicación non violenta, habilidades sociais, cooperación, fomento da incorporación da muller á actividade asociativa...

3. OBRADOIROS DE PROMOCIÓN DA SAÚDE INTEGRAL: Lévanse a cabo obradoiros sobre a saúde física, mental e emocional… e de reflexión sobre a sexualidade e diversidade de xénero.