Noticias
Participaremos no acto de clausura da Tribo Vedra帽a
Curso de formación da Fundación Eomaia
28/04/2021 | Ponteareas
Mañá, xoves 29, participaremos no acto de clausura do Curso de Voluntariado “Tribo Vedraña” que terá lugar no Auditorio Reveriano Soutullo de Ponteareas a partires das 11h.
Fomos convidados por Lucía González presidenta da Fundación Eomaia que nos visitou, acompañada, o pasado 12 de marzo.
O curso desenvolveuse desde o pasado 19 de febrero e ó longo de marzo e abril, cun total de 40 horas, destinado a persoas interesadas dos concellos de Ponteareas, Covelo e Mondariz. A pretensión é crear un núcleo forte de voluntariado formado que sirva de inicio a unha rede permanente que fomente valores de solidariedade, compaixón e responsabilidade social, para dar resposta ás necesidades e carencias sobre a demanda potencial da prestación de servizos para persoas maiores da comunidade rural na contorna de Ponteareas, Mondariz e Covelo. E desenvolver programas que integren distintos proxectos dirixidos ós maiores e ás súas familias coidadoras a través de actividades educativas, formativas/informativas, artísticas, e da prestación de servizos de proximidade e acompañamento para que este sector da poboación permaneza no seu medio o maior tempo posible.
O programa do curso que se impartiu tratou de contribuír a recuperar a participación das persoas maiores na sociedade e potenciar a xeración de espazos inter-personais e dinamización cultural da contorna. Encamiñouse á posibilidade da participación activa, das persoas maiores, na súa vida social e familiar, gozar dunha calidade de vida e respectar a súa dignidade nesta etapa da vida. A artellar unha serie de accións, levadas a cabo por persoal voluntario, que sirvan de apoio ás persoas e ás súas familias, para engadir calidade e alivio na etapa final da vida.
Así mesmo, o programa pretendeu achegar á cidadanía en xeral as ferramentas informativas, formativas e asistenciais que contribúan a manter e protexer a autonomía persoal e as decisións baixo o amparo de ser cidadáns/ as de pleno dereito. Enmárcase dentro do proxecto de acompañamento ó final da vida, “ Unha boa morte para todas as persoas”, co fin de fornecer na medida do posible unha boa vida que desemboque nun fin digno e respectado, favorecido por vencellos afectivos que sexan produto dunha relación inter- xeracional e de veciñanza saudable, dinámica e creativa.
Arquivada en:
Infórmate > Noticias