Accesibilidad

Noticias 

A natureza ten dereitos, a muller tamén.

Plantación de árbores en memoria das vítimas. 25 N

26/11/2022 | Xinzo de Limia

Con esta lenda profesoras do IES Lagoa de Antela: Rosa, Belén, Carmen, Mercedes, e o alumnado de 2º da ESO, fixeron unha homenaxe a aquelas mulleres que foron asasinadas ao longo do 2022. Vítimas da violencia machista, a súa vida quedou truncada. Ningunha acción posterior vai devolvelas ás súas familias. A acción que se levou adiante foi a plantación dunha árbore en recordo de cada unha das mulleres; os homes que exerceron a violencia machista acabaron coa súa vida, recordarémolas no medrar destas árbores que se plantaron o 25 de novembro de 2022.
Sabemos que son actos simbólicos, é difícil acabar con esta lacra. Só leis que castiguen ao agresor e se cumpran, mudar a mentalidade de moitos homes é algunhas mulleres que aínda xustifican estes actos, a educación dos rapaces e rapazas; poderá ir axudando a facer un mundo máis xusto para todas as mulleres. Cando vexamos medrar estas árbores ao carón das instalacións deportivas do concello recordaremos as mulleres que non están aquí.
Unha vez madurada a idea polo IES Lagoa de Antela había que sacala adiante. Necesitábase unha axuda externa para orientalas, un aporte das árbores e un lugar onde plantar. E finalmente a acción e a homenaxe.
As xestións de pór en contacto aos participantes, orientar no que se podía plantar, seleccionar as árbores, buscar, dentro duns límites, o lugar de plantación correu a cargo  do CDR “O Viso” (voluntariado e persoal laboral) e a profesora Mª do Carmo Miguez de Xestión forestal do IES Cidade de Antioquía, que a súa vez proporcionaron a planta obtida a través das actividades formativas do ciclo.
Elvira Lama, alcaldesa do Concello, foi a encargada de proporcionar un lugar axeitado e de fácil aceso para o alumnado. O acto queda encadrado dentro das actividades programadas polo concello para ese día. A súa vez a través de Juan, que leva o obradoiro de xardinería e o voluntariado do CDR “O Viso”, elíxese o lugar para a plantación. Os traballadores deste obradoiro fan os buratos.
E o 25 de novembro unha chea de alumnado do IES Lagoa de Antela acompañado polas súas profesoras, fan a plantación, orientados e axudados por Teresa e Pedro do obradoiro e por Camilo e Tomás do CDR “ O Viso”. Así lévase adiante esta homenaxe. Ogallá sexa o último que hai que facer por este motivo.

Arquivada en:
Infórmate > Noticias