Accesibilidad

Noticias 

© CDR O Viso | 10/04/2022 | Gomareite 1

O patrimonio da xente boa

Un lecer saudable en familia

10/04/2022 | Vilar de Gomareite

Este sábado, 9 de abril, foi deses que permanecerán nun recuncho das nosas memorias polo moito que compartimos no sábado en familia máis intenso de cantos levamos: a Uxía e o Samuel, filla e pai, son unha combinación perfecta de enerxía, inquedanza, sabedoría e saber facer e leváronnos monte arriba no seu Vilar de Gomareite (Concello de Vilar de Barrio) nunha andaina que case pasa das tres horas.
Tras eles fomos unhas vinte persoas máis coñecendo historias sobre a terra, descubrindo ducias de propiedades das herbas do noso monte explicadas polo Samuel, que recolle o saber da súa nai, que se forma e que investiga para manter vivo o saber ancestral.
Entre conversas tamén fomos descubrindo lugares con historia: o castro, o castelo, a poza do mouro... 
Foi unha xornada na que fomos conscientes, unha vez máis, da riqueza paisaxística, natural e histórica da nosa comarca, e, sobre todo, do patrimonio da nosa boa xente, a que comparte camiños, saberes e historias propias sen mirar o reloxo e coa única pretensión de ser e estar.
Graciñas a cantas persoas participastes nesta xornada por facer posible un ocio saudable en familia.
E Graciñas a Uxía, a Samuel e a Herminia por eses doces deliciosos que tanto prestaron!

"Sábados en Familia"  é unha actividade dirixida a toda persoa, financiada pola consellería de Política Social da Xunta de Galicia a través da subvención con cargo á asignación tributaria do 0,7% do imposto dobre a renda das persoas físicas dentro do programa “O noso espazo: encontros de familia, parentalidade positiva e actividades educativas” do CDR O VISO.

Arquivada en:
Infórmate > Noticias